كلمة بتستفزني أوي. كل ما اجي أقول لحد انت بتعمل كدة ليه, يقولي: "أصل الناس كلها بتعمل كدة".
أنا بصراحة مش فاهمة مين "الناس كلها" اللي عنده دول, لأن أنا لما ببص حوالي ساعتها مش بلاقي حد بيعمل زيو أصلا!
بس لازم كلنا نعترف ان في على الأقل حاجة بنعملها مش مقتنعين بيها بس بنعملها علشان "الناس كلها"
يعني مثلا: كل ما نيجي نقابل حد, نقعد نقول "ازيك؟" وهو يقول "الحمد لله". وبعدين تقول "عامل اية؟". بردو يقولك "الحمد لله" حتي لو هو حالته صعبة. وانت عارف انو بيقول كدة وخلاص. هي حاجة احنا متعودين عليها, مش بقول انها حاجة وحشة, بس ايه السبب وراها؟ أنا عارف اني لما هسأله هيقولي "الحمد لله" طب بسأل ليه من الأول؟؟! "علشان الناس كلها بتعمل كدة"
أو يمكن دي عادات وتقاليد. بس العادات والتقاليد دي حاجة بردو "الناس كلها" بتعملها. والا مكانتش هتبقى عادات وتقاليد!!
احنا ليه بقا بنعمل كدة؟ مش علشان الناس كلها, علشان لو حد عمل حاجة مختلفة هنستغربه, وهناخد عنه فكرة انو مش طبيعي. وطبيعي دي تقاس علي الحاجات اللي "الناس كلها بتعملها".
حتى لو حد عمل حاجة مختلفة, هتعجب حد, هيبدأ يعملها, حد تاني تعجبه, يعملها, وكللو يبدأ يعملها لحد ما تكون هي كمان حاجة "الناس كلها بتعملها" و هكذا.
-----------------
مش عارفة ليه الناس عندها عقدة من الناس!! مفروض كل واحد يخليه في نفسه و ملوش دعوة غيره بيعمل ايه. كدة محدش هيخاف انو يعمل حاجة غير اللي "الناس كلها بتعملها", وكل واحد هيبان على حقيقته. هتريح أوي.
نفسي كدة أكلم حد في التليفون, يقوللي حاجة غير "ازيك". حاجة تانية. أي حاجة. مختلفة. غير اللي "الناس كلها بتقولها".
Rahma Fateen
No comments:
Post a Comment