من زمااااااان وأنا عايزة أتكلم عن الموضوع دة, وبما ان كل احاسيس الكراهية والضيق والاشمئزاز و الضيق. ايه قلتها؟ اه والاحتقار وكل الأحاسيس الوحشة مركزة في الموضوع دة, فأنا مش عارفة أبدأ بايه ولا ايه..
زعلانة عليكي يا مصر..
لما تكون بلد مذكورة في القران وأهلها مفيش جملة بتتقال مفيهاش شتيمة يبقى ايه؟
ألطم ولا أعيط ولا أروح أنتحر؟
يعني مفروض ده دليل على ايه؟ الواحد لما بيشتم بيحس بايه يعني؟راجل و روش و"كوول" يعني مثلا؟!
أولاً دة مش منظرحضاري بالمرَة, لمَا ولد عنده مش أكترمن 8 سنين بيسبَلي الدين, يبقى مش بيوضح غير العادي اللي بيحصل. أناعايزة أسأل سؤال, انت ليه بتستغرب لما تسمع طفل بيشتم وتقوللو كدة غلط وانت أصلا بتشتم؟ هيكون اتعلم من مين؟ بعدين انت أكتر منه في ايه انك تسمح لنفسك انك تشتم وهو لأ؟ ولا انت شايف انها مش حاجة غلط أصلاً؟
أنا فاكرة زمان لمَا كان حد بيقول"غبي" كان بيتهزئ ومش بيسيبوه في حاله, دلوقتي بقولهم متقولوش على حد "كلب" يضحكوا على ان كلب دي أصلا مش شتيمة. هو لازم تبقى عربجي ولسانك مش نظيف علشان تنفع في البلد دي؟ حتى لو كانت هزار, بعد كدة هتتعود ووقت الجد هتكون أوحش ومش هينفع ساعتها الكلام.
لكننى اظن ان الشتيمة في الخناقات بتوجع أكثر من الضرب في الخناقات. لأنك لو اتعورت في خناقة ضرب, انت مفضوح مفضوح, كل الناس هتشوف التعويرة. انما لو اتشتمت شتيمة جامدة, مش هتفضل طول مانتا ماشي تعرف الناس انك اتشتمت, بس هتفضل فاكرها وهتتأثر من جواك (لو كان عندك دم يعني)
وبعدين انت ليه تسمح لنفسك انك تتهان وتتشتم؟ اه الشتيمة اهانة!! انت لو مبتشتمش من أصلو, ومعروف ان لسانك نظيف, محدش هيقدر يشتمك ويقول عليك كلمة وحشة.
"اللي ما ترضاهوش لنفسك ماترضاهوش لغيرك."
المصيبة الأكبر بأة, موضوع برضو كنت عايزة أتكلم فيه, ان الناس بتقلد من غير ماتفهم. أو على رأي أخويا العزيز, "بتبغبن" (جاية من كلمة بغبغان).
~سمعت كلمة في فيلم أو في الشارع (وزي ماقولنا ان الشارع المصري, وللأسف, مليان فيه "ألفاظ خبيثة" زي ما والدة صديقتي العزيزة بتقول) في أقرب فرصة, رحت قلتها لأصحابي (علشان أكون أروش واحدة فيهم وكدزة) وبدأت أقولها كثير, بعد كدة اكتشفت انها شتيمة. طب حلو! أديني مثقفة وأب تودايت. وأنا كدة بقيت مصدقة نفسي وبقولها بثقة وأنا متأكدة ان الناس كدة هتحبني.
ومع ان المفروض العكس, الناس تحتقرني, بس أهو كدة حالنا, أحسن واحد فينا عنده أوسخ لسان, بسم الله الله أكبر علينا.
(مكنتش عايزة أقول كلمة "أوسخ" بس مفيش كلمة أقدر أوصف بيها غيرها) آسفين! :O
كلمة للشعب المصري:
-يا ريت تخلي لسانك نظيف.
- يا ريت تسأل نفسك الكلام دة هيبسط اللي قدامي ولا هيزعلو.
-يا ريت تخلَي منظر المصريين قدام العالم منظر يفرح.
-يا ريت تكون حضاري وتحافظ علي كلامك.
-يا ريت تفكر في الكلمة قبل ما تقولها.
-يا ريت مترددش أي حاجة تسمعها.
-يا ريت نفهم..
وبقول الكلام دة لنفسي قبل أي حد
وطلب أخير, يا ريت تعمل شير :D
Rahma Fateen
No comments:
Post a Comment