عارفين النكتة بتاعت الواحد اللي قعد يجري ورا راجل يسألو انت صيني؟ يقوللو لأ. يقوللو طب أمك صينية؟ يقوللو لأ. يقوللو طب أبوك صيني؟ يقوللو لأ. يقوللو طب جدك صيني؟ يقوللو لأ. فالراجل يزهأ منه ولما يسألو طب جدتك صينية, يروح يقوللو اه. يروح يقوللو طب عينك مش صغيرة ليه.
مش بقولوكو كدة علشان تضحكو, هي أصلا سخيفة أنا عارفة. أنا بس لفتت انتباهي لما حصل معايا نفس الموقف.
حطيت حنة في شعري, وكل ما أعدي جنب بابايا أسألو شعري أحمر؟ يقوللي لأ. أعدي تاني أسألو شعري أحمر؟ يقوللي لأ. وكل مل أعدي أسألو شعري أحمر؟ يقوللي لأ. لحد لما زهأ راح قايللي اه.
أنا عارفة ان شعري مش أحمر, وهو رد عليا مليون مرة. بس اتبسطت لما قاللي اه في الاخر مع انها واضحة انه بيقول كدة وخلاص.
أي حاجة بتتقاللك حتى لو صغيرة, حتى لو تافهة حتى لو واضح انها مش الحقيقة, ممكن تبسطك, وساعات بتغير حياة ناس. أي كلمة صغيرة بتتقال, ممكن تسيب أثر في حياتنا للأبد.
أنا مرة كنت متعورة في صباعي عادي جدا, لقيت واحدة معرفهاش ولا عمري اتكلمت معاها ولا أخذت بالي انها عايشة أصلا, كانت بتصلي جنبي, فبعد الصلاة سألتني مال صباعك؟ اتبسطت جداا, متتخيلوش قد ايه. متعورة في صباعي دي حاجة تافهة جدا, وهي قالت كدة علشان تفرحني, مش علشان تتعرف عليا أو حاجة. مشفتهاش تاني بعدها, بس لغاية دلوقتي فاكرة الموقف ده وكل ما بفتكرو ببتسم.
ليه منعملش كدة مع كل الناس؟ أي حاجة صغيرة.
مرة كدة من نفسك جيب شوكولاتة لأخوك الصغير وانتا جي, ومش هتصدق مدى سعادته هتبقى قد ايه. انت نفسك هتتبسط. هتحس انك أثرت في حد حتى لو بس خليتو يبتسم.
الحاجات الصغيرة دي صدقوني بتقعد للأبد.
اعزم والدك على العشاء مرة.
جيبي لأختك هدية بدون سبب.
اسأل علي حد بقالك كتير مشفتهوش.
كلم حد من أقاربك أسأل عليه.
اضحك في وش حد بيبصلك كتير.
لو اتعودنا نعمل حاجات كتير زي دي, حياتنا كلها ممكن تتغير.
Rahma Fateen
1 comment:
that's totally true!! it's always about those little things that make us better =)
Post a Comment