ديليت تحرير

متحكمش قبل ما تخلص :*

________________

حكم قعد 30 سنة, مستبد, ظالم, مخادع. الشعب مكنش لاقي لقمة العيش, مكنش قادر يستحمل أكثر من كدة. 

والفضل يرجع لتونس بعد الله, بدأو ثورة واحنا وراهم. شعب مصر العظيم نزل في الشارع, وهتافات واعتصامات ومظاهرات. وبعد تضحية كتير وتحمل, قدرنا بفضل الله نسقط النظام في 18 يوم. 

كانت أحلى أيام حياتي, ومع ان مكنش في أمن و الناس كلها خايفة, بس كل طوائف الشعب كانت ايد واحدة. حتى باسم يوسف كان بيضحك ساعتها أكتر من دلوقتي. لسة الهتافات بترن في مخًي. الروح اللي كانت في التحرير لا توصف, الكل بيساعد بعضه, مفيش فرق بين مسلم ولا مسيحي, اخواني ولا لبرالي, بنهتف علشان هدف واحد, ننهض بأم الدنيا. ازاي أم الدنيا يبقي اسمها أم الدنيا وهي مش أم الدنيا؟ ولا حتى من البلاد المتقدمة. مش هنغير عليها بأة؟ 

المهم ان بعد ما تخلصنا من الظلم والحمد لله, مش عايزة أقول الكل بان على حقيقته علشان متأكدة ان المصريين أحسن من كدة, بس مش عارفة هل دة خوف على الوطن ولا مصالح شخصية. 

بعدين عشنا حكم عسكري مدة مش قليلة, وأخيراً انتخبنا رئيس مدني بانتخابات عادلة جداً و ديموقراطية آخر حاجة. عملنا دستور, بغض النظر عاجبكو ولا لأ لأن نص الناس مقريتهوش أصلا و قرروا على حسب كلام الاعلام, الشعب وافق عليه بنسبة كبيرة ودة اللي هنمشي عليه رغم أنف المعارضين. ليه رغم أنفهم؟ علشان هي دي الديموقراطية. الشعب وافق على الدستور خلاص خلصت, عاجبنا أو مش عاجبنا. 

الرئيس الحاكم مدته 4 سنين. أظن بأة ميصحًش ننزل نهتف "الشعب يريد اسقاط النظام" 

أولاً: الشعب مش كله معارضين. 

ثانيا: مينفعش نسقط نظام لسة مكملش مدته المتفقين عليها علشان في حاجات معينة معترضين عليها. اهتف ضد الحاجات المش عاجباك أوكي بس ضد النظام؟ أهي دي مش ديموقراطية. ولا ديموقراطية اننا نفضل متمسكين برأينا و نخرب لحد ما يسمعو اللي على مزاجنا. ممكن نتنازل من أجل الوطن ولا ايه؟ احنا مش عاجنا حاجة في غيرنا عاجبوا. 

أنا بصراحة أتفق جدا مع الشخص اللي قال ان شعب مصر مش مؤهل للديموقراطية. 

وبعدين مش كفاية؟ محدش زهئ؟ كل شوية يعملو مظاهرات وفي الآخر بردو بيعملو اللي كانو هيعملوا. 

نفسي نطلع ميدان التحرير من مخًنا شوية ونبدأ نشتغل بجد. كل واحد يعمل اللي عليه وزيادة علشان يكون ايد في تطور البلد ان شاء الله. نستنى الأربع سنين دول, مش كتار يعني, لو فعلا محصلش تغيير متنتخبوهمش في الدورة الجاية, لو شايفيين أنهم أثروا كل واحد حرً بأة. بس الديموقراطية اننا نتقبل اللي الشعب اختاره و نتعامل معاه, نستحمله, نضحي علشان التغيير, مش مشكلة. اللي استحمل 30 سنة هيقدر يستحمل 4. 

اعملو ديليت التحرير واشتغلوا والطمو كأنه مش موجود.

بلييييز

Rahma Fateen